Lífið í lit

19.12.2008 | 15:18

Nánd og nærvera ...

...

Tíminn æðir áfram á gamalsaldri. Konan er ung en gamlan í henni lifir líf úr lífi. Konan veit tilfinningar og tilveru sem var og ber saman við það sem er. Hún sleppir neistum út í umheim og horfir eftir huga sínum eins og gamlárskvöld væri. Lífið sem vex eins og blóm sem teygir sig í átt birtunnar.

Blómið, ertu þú. Þú sem horfir í átt betri vegar, óttast og vonar að dagsbirtan færi þér gleði og bjarta sýn á deginum.

Í dag þá var síðasti dagurinn í skólanum og krakkarnir mínir komu með spjöldin sín heim. Þau stóðu sig bæði vel. Dóttlan hefði getað kætt hvaða foreldra sem var fyrir frammistöðuna sína. Sonur minn kætti okkur á sinn máta, þessi elska. Hann gerði það sem í hans valdi stóð. Lesblindukvillinn hans setur strik í reikninginn ....

Honum fannst hann hafa gjörsamlega brillerað, kom heim með fallega jólaskreytingu og jólapunt! Hvað eru einkunnir á milli vina þegar litla hjartað stendur roggmonntin með spjaldið sitt sem ........

Jólin koma og fara. Gráu hárin herða sig og hamingjan styrkist með hverri mínútunni sem líður. Uppþottavélin maular á meðan sú gamla situr og hamrar á makkann ....

Það er ekkert betra en tími samveru og kærleika. Við í hverju horni og þið sem hjúfrið að kærleikans hönd.

Jólaglögg bíður konunnar í kvöld og ég vona að það verði gaman. Efast ekkert.

Flokkur: Menning og listir | Facebook

Athugasemdir

Hér er heilsan loksins farin að láta sjá í hornið á sér, svo hér eru bjartir tímar framundan. Hafðu það ávallt sem best kæra vinkona góða skemmtun í kvöld.

Ásdís Sigurðardóttir, 19.12.2008 kl. 16:47

Þú ert náttúrlega yndislegt skáld og til hamingju með fallegu textana þína. Þetta fyrir utan alla aðra sköpunargáfu sem þú býrð yfir. Þessi tilfinning gagnvart börnunum er alveg sér á báti og sannarlega - hvað eru einkunnir eiginlega og hvers konar mælikvarði á hvað?

Njóttu kvöldsins í góðra vina hópi.

Hjartkær kveðja

Unnur Sólrún (IP-tala skráð) 19.12.2008 kl. 17:16